معالجة الفكرة فنيًا | مراحل الإنتاج

بعد أن اصبح بحوزتك عميل معَ فكرة واضحة لما يُريد ..

الآن تأتي مرحلة الامساك بالقلم .. ابدأ برسم سكيتشات بسيطة لمحاولة اسقاط ما بذهنك على الورق

مُش مهم تكون خطوطك نظيفة أو نهائية، فقط ركز على بُنية المشاهد. وين خط الارض، الكاميرا، المنظور، توزيع العناصر، الخ .. بإمكانك ترجع للـ“Mood Boards“ اللي جمعتهم و تبني عالمشاهد اللي لاقت استحسانك. فقط ركز على بنية المشهد، في اي جهة منه راح يكون التركيز أعلى وهكذا ..

ارسم عدة مشاهد متفرقة، حاول تصنع تسلسل للمشاهد بذهنك، شيء بسيط ومتعلق بالفكرة مش بالنص تحديدًا.

هذي المرحلة اعتبرها جزء من العصف الذهني للفكرة، لازال كل شيء أولي، لازال كل شيء في مراحله المبكرة، تلوين مبدأئي، تكوين/توزيع عناصر وفراغات مبدأي. لغرض لملمة الانتاج إن صح التعبير.

استخرج Color palette لعملك، ممكن أكثر من Color palette وحط مجموعة النتائج اللي وصلت لها بملف PDF وقفل عليه … اتركه ... لاتراجعه ولاتقيمه. اتركه فقط وسوي أي شيء يفصل بين هالمرحلة والمرحلة القادمة، مهما كان وقتك ضيق، لو تمشي عشر دقائق بالخارج أو تطبخ لك أندومي، فقط افصل شوي.

لاحقًا راح تمر بـ مرحلتين وهي (كتابة السكربت) وَ (تصميم الستوري بورد) راح اترك هالمرحلتين للتدوينة القادمة لأن يبيلهم تفصيل. لكن بفترض الآن انك أنهيت العمل عالسكربت وَ الستوري بورد.

الآن انت بحاجة إنك توصل للعميل تصورك المبدأي قبل لاتبدأ الانتاج الفعلي، قبل لاتعتمده وتطوره، لأن ببساطه ممكن يرفض هالتوجه واكيد انك تبي تحفظ وقتك وجهدك فبالتالي راح تعطيه آخر تحديثاتك.

فيه أشخاص يفضلون يشاركون الستوري بورد فقط! وبرأيي لامانع من مشاركة (أكثر) من الستوري بورد.

وش تشاركه! وكيف تضمن إن هالتصورات الأوليه ماتخليه يرتاب من المشروع ويرفض إكماله معك؟

اعمل على بريف خاص بك وبرؤيك الفنية للمشروع وَقدمه،

قد يكون طويل بعض الشيء ويمكن تحس إن ماأحد بيقرأه كامل، لكنه يساعدك على سرد قصتك ويعكس كذلك الجهد اللي بذلته في هالمشروع، قد لايكترث المنتجين الآخرين لهالخطوات، لكننا نتكلم عن مستوى فوق العادي. عن شغل أنظف وَ اكثر احترافية .. لأن عشرين واحد يقدر يقدم شغله بشكل عادي بس مو انت. وأظن إنه راح يكون مقنع اكثر في حال كان فيه منافسين تعاون معهم عميلك.

تعملت هالشيء من Colin Hesterly  – أحد أفضل مخرجي الأفلام القصيرة الدعائية (موشن/أنميشن).

وهنا شو ريل لأعماله : 

ولأني مهتمة حقيقةً بنشر التكنيكات الجيدة اللي يستخدمها الفنانين من حول العالم

راح اشارككم طريقة تقديم كولن للبريف لأحد أفضل مشاريعه Diamond In The Bottle ، (ودي اوريكم فيديو المشروع نفسه لكنه مو متاح للجميع مع الأسف).

بطبيعة أي عرض تقديمي راح تستخدم مقدمة فيها عنوان المشروع واسم الجهة المقدم لها وشعارك الشخصي أو شعار الشركة المنتجة.

وهذي تقدر تقدمها بالطريقة اللي تحب، لذلك راح انتقل للشرائح التالية …

التوجه :

أهم ماذكره كولين في هذة الشريحة،

• سوف نصنع مشاهد أنميشن عجيبه ومثيرة لـ “Diamond In The Bottle“ سيضم أربع قصص مختلفة: اكتشاف الحُب، النجاح، التراث،والتعليم. في حين أن جميع المشاهد متصلة ببصيص الألماس.
• الرسوم والألوان مستوحاة من إعلانات النبيذ القديمة، والحركة الحرفية الأمريكية في بداياتها.
• سنقوم ببناء عالم بصري يُشعرك بالدفئ والحنين.
• الالوان والصور كلها ستذكرك بوادي NAPA، سنصنع عالمًا دافئًا يُتبادر لذهنك حينما تراه الأمل وَ الفرص. مثلما تشاهد شروق الشمس، المشي للحديقة أومشاركة العشاء مع شخص تحبه.
• حركة الكاميرا ستساعد على فرض هذا الشعور مشهدًا بمشهد، ستتدفق بسلاسة جوانب مختلفة لـ الألماس. وفي نهاية المطاف سنكشف عن أن جميع القصص الاربع تحدث داخل الالماسة نفسها.

بعد شرح مبسط لفلسفة الفيلم أو خنقول كيف فكرت بإخراجه، تنتقل للتصاميم والرسومات،

مشهد واحد أو اثنين كافي جدًا لتوضيح الألوان و جوّ فيلمك.

احرص دائمًا في تقديمك للمشروع إنك توضح شيئين (الشخصيات) وَ (البيئات). لاتعرض أحدهم وتتجاهل الآخر. إذا بتعرض مشهد واحد فقط، اختار مشهد يشمل الإثنين أوَ ارفق كل واحد منهم على حدى.

كذلك مجموعة الألوان المستخدمة:

خيار (أو اكثر) لتصميم الشخصيات:

يُفضل عادةً إنك ترفق خيار آخر، نمط مختلف لنفس مشهدك، أبسط مثلًا  ! تقلل العناصر غير الضرورية، تستخدم باليت ألوان مختلف، يكون المشهد مايحوي خامات كثير، زوم مختلف! ، أي خيار آخر تشوفه مُناسب.

نمط ٢ المقترح: مُطبق عالمشهد الاول، بـ باليت ألوان مختلف.

طبعًا تحتاج توضح الفروقات بين النمطين المختلفين، وعلى إيش كل نمط جالس يركز والتوجه تبعه.

كذلك ترفق الـ “Mood Boards“ اللي سبق وتكلمت عنها في الجزء الأول من السلسلة ..

• بخصوص الطابع المُستلهم منه (اعلانات الفنتج).

• بخصوص قرية نابا.

• بخصوص الاضاءة.

وأخيراً شريحة تتحدث فيها عن الأنميشن بشكل بسيط، كيف راح تحرك! كيف راح تكون الانتقالات وتصورك للحركة، ممكن تأكد على زمن الفيديو وأي شيء تقني تشوف إنه من المستحسن توضحه. 

إذا ماحسيت إن عندك شيء تذكره، اترك لنفسك المجال مفتوح .. أثناء العمل راح تطلع معك أفكار اكثر، كذلك بالإمكان إنك تشير لأن تصاميمك غير نهائية في حال شعرت إن بالإمكان يطلع معك شيء أفضل مع الحرص إنك ماتخرج بشيء مغاير تمامًا لأن اخذت موافقتهم عالمعروض فلاتشطح واجد.

وأخيرًا قدم الشكر لـ العميل لإتاحة الفرصة، وَتمنيات بإتمام المشروع بشكل يُعكس شغفك وَ اهتمامك بسرد القصص وَ الأنميشن. حاول أنك تنهي عرضك بجملة مثيرة للإهتمام،

كولين يختم بـ : Lets have some fun!

شاهد بعضًا من أعمال كولين ..

لم ننتهِ بعد.

عايشة