افضل طريقة لتعلم الموشن جرافيك | دخول المجال

أهلًا بعودتك،

وصلني سؤال من أحد متابعي المدونة ( ماهي أفضل طريقة لتعلم الموشن جرافيك؟ )

وكعادة الأسئلة اللي توصلني، واللي أشعر إن الكلام فيها يطول .. أفضل أجاوب بتدوينة أشاركها الجميع.

وهنا أتذكر مقولة لجلال الدين الرومي “من مشى بغير دليل قطع الطريق التي تُقطع في يومين، في عامان“

خلونا نتفق بإن اللي يتعلم أي عِلم بوجود مرشد يختصر على نفسه الكثير من الوقت والجهد

السؤال يبدو بديهي، لكنه جميل وذكي … الطرق كثيرة للتعلم ولكن أيها الأفضل؟

هل أتعلم ذاتي؟ هل آخذ كورس أونلاين؟ هل آخذه بمعهد حضوري؟ هل تكفيني مقاطع Youtube ؟ هل أشتري كتاب الكتروني ؟ هل يحتاج آخذ شهادة في التخصص؟ هل أبدأ بتعلم الرسم؟ ولا ابدا بالتحريك؟ هل ضروري أكون رسام علشان أدخل مجال الموشن جرافيك؟ هل ينفع أتخصص في الإثنين ولا الأفضل مجال واحد؟

صداع .. صح!

علشان تبسط على نفسك الأمور، خلينا نمسكها حبة حبة

الموشن عمل جماعي، ما يعني أنه عمل فريق … نادرًا مايكون منتج فردي، تحتاج مواهب مختلفة من كتابة واخراج ورسم وتحريك وذوق موسيقي وصوت وإلقاء جيدين، وهذي الامور كلها يندر إنها تجتمع في شخص واحد

لذلك ضروري في بدايتك تعرف فريق الموشن جرافيك، علشان لاحقًا تقرر من وين راح تبدأ رحلة تعلمك!

هل من الضروري توفر فريق من 9 أشخاص لإنتاج فيديو موشن! طبعًا لأ، لأنها حالة مثالية وغالبًا ماتصير إلا في الستوديوهات الكبيرة.

لذلك لما نجي نشوف الفريق العامل لأي مشروع يعجبنا (الـ Credit) نلقى الأسماء لـ 10/15 شخص عالفيديو الواحد وتوصل أكثر من كذا بكثير .. لكن نرجع نقول إنها حالة مثالية جدًا

وغالبًا إن أعضاء فريق الموشن يمتلكون أكثر من مهارة مثلًا (كتابة/اخراج) .. (ستوري بورد/رسم) .. (رسم/تحريك) .. (تحريك/اخراج) .. (ستوري بورد/اخراج) .. (تحريك/وهندسة صوت) … والبعض من تمكنه يوصل إنه يصمم ويرسم ويحرك ويركب المؤثرات. لكنه لا غنى له عن كاتب ومؤدي صوت مثلًا .. وهذا اللي يخلينا نأكد على إن الموشن جرافيك عمل جماعي.

قبل لا تفكر بخطتك المستقبلية، وكم مهارة ودك تتعلم .. انصحك تاخذ فكرة بسيطة عن كل المراحل

تتعلمها جميعًا بشكل مبسط وبعدها تقرر وين لقيت نفسك ووش تقدر تاخذ مهام.

وهنا أذكرك في بداية الرحلة إنك تحتاج لشبكة معارف من الفنانين : كتاب، مؤدين صوت، محركين، رسامين،مهندسين صوت.

ضروري جدًا يكون عندك تواصل مع فنانين عندهم المهارات اللي مالك اهتمام تتعلمها بحيث تلقى من يكملك بمشاريعك.

طيب!

هذا فريق الموشن وعرفته، يبقى عليك تعرف رحلة الإنتاج وهذي سبق وتكلمت عنها في تدوينة (كيف نعد لفيديو من وصول النص!)

اخذنا نظرة عامة، لكن للأن ماجوبنا سؤال كيف نتعلم!

ببساطة الجواب : ابدأ بالمتوفر.

ابدأ بالمجاني والمتاح (يوتيوب) .. تعرف عالواجهة والأدوات والبرامج.

وإذا شعرت انك اكتفيت من الأساسيات ودروس المبتدئين، انتقل للكورسات المدفوعة من مواقع مثل :

Skill share / School of motion / Mograph Mentor / Motion School / Domistka

وبكل بساطة ابدأ طبق الدروس .. تابع وطبق .. تابع وطبق لحد ما تعتاد على الأدوات ووقتها بتكون حصلت على المعرفة اللازمة.

هل هذا كافي؟ لا، بعد معرفة الأدوات تحتاج تطور نفسك فنيًا، تطور ذوقك وفهمك للأساليب المختلفة وتجرب إنك تستخدمها بأعمالك.

إذا حسيت إن معلوماتك بسيطة ولازلت محتاج دفعة في تعلم الأساسيات، ابحث عن شركة تدربك .. لكن لاتروح للشركة وانت صفر معلومات علشان لاتضيع وقتك ووقتهم .. وإذا مالقيت فرصة للتدريب لأي سبب .. مارس بشكل حر وانشر في الانترنت، إلى ماتتحسن

والإتقان يجي بكثرة الممارسة والتعلم من الآخرين. هذا جوابي بشكل عام

لكني بفصّل في تجربتي في تعلم المجال واللي أشوف إنها كانت جيدة، لكني أردك إنها قد ما تتيسر للكل

بدأ الموضوع باهتمام مني بمجال الأنميشن .. وكعادة أي سبيل للتعلم الموضوع يحتاج منك على الأقل اهتمام حقيقي بالمجال.

لما حاولت إني ابحث عن فرص عمل بالمجال أو اعرف شركات تشغّل فيه، مالقيت عندنا بالسعودية فرص جيدة

لكني بالصدفة اكتشفت إن فيه شيء أقرب للأنميشن، وهو الموشن جرافيك .. وعلى عكس الأنميشن فرص العمل فيه متاحة بمعظم وكالات التسويق وبيوت الإنتاج .. عرفت إن اسم التخصص موشن جرافيك وهنا حسيت إني مسكت طرف الخيط.

انتقلت من مرحلة الإهتمام، لمرحلة البحث والإطلاع .. المعرفة النظرية عن المجال

بحيث إنك تقرأ معظم النتائج اللي تطلع لك بـ Google عن تخصص الموشن جرافيك / Motion Graphic .. عربي وإنقلش قدّ ماتقدر

تعرف وش هو؟ مين هم اللي يشتغلون فيه؟ مين المنتجين له؟ مين هم الـ Top Ten في التخصص هذا؟ كيف اقد اوصلهم واتابعهم؟

اطلع واقرأ (نظريًا) لحد ماتتشبع معلومات وتشعر إن جميع تساؤلاتك زالت .. وهالشيء يساعدك فيه قوقل مهما يكن تساؤلك

انت الآن في مرحلة تعرف المجال، وتعرف رواده، وتعرف البرامج المستخدمه، والأدوات اللازمة

في هالمرحلة حسيت إني أبغى خطوة أكبر، أبغى أعرف عن المجال عمليًا

انتقلت لمرحلة معرفة كيفية الحصول أو تحميل البرامج Adobe After effect و Adobe illustrator

ووقتها بحثت عن أول كورس مجاني (أساسيات الأفترافكت) .. كان باللغة العربية وللمبتدئين بمنصة إسمها مهارة

وهذا الكورس اللي أخذته “أحاول أنقل التجربة زي ماهي، مايعني إني أوصي فيه“

https://www.maharah.net/courses/botshe-team

تابعت الكورس وأنا للآن ماحصلت عالبرامج، عرفت إنها تتحمل عن طريق أدوبي وباشتراك شهري/سنوي لكن وقتها ماعرفت أحملها.

فمن حماسي تابعت الكورس بدون أي تطبيق وبدون مشاهدة فعليه لواجهة البرنامج ولكني عرفتها من الدروس وحسيت إني مستوعبة الموضوع أكثر.

شفت إعلان بتويتر يبحثون عن موشن ديزاينر، وقلت خليني أجرب أرسل لهم طلب تدريب

وبالفعل، أرفقت مجموعة من رسوماتي (رسم بالفوتوشوب) وذكرت إني حابة أتدرب في الموشن علمًا إني ما أعرف فيه شيء

الشركة وقتها كانت صغيرة، وأنا أول شخص يطلبهم تدريب .. فتحمسوا للفكرة ووافقوا

واتفاقنا كان أداوم معهم 3 أشهر دوام كامل بلا راتب مقابل التعلم، وهم يعلموني مقابل إني أساعدهم إن احتاجوا. كانت صفقة رابحة بالنسبة لي مع إن كثير كانوا يقولون لي حتى المتدربين ياخذون مكآفئة .. ليه ماتاخذين أي مقابل!

كنت أحس إني فعليًا اروح معهد، ماكان تدريب عادي بالنسبة لي، كانت المعلومات أكثر قيمة من أي مكآفئة ممكن آخذها، وكنت أقدّر وأستشعر الجهد اللي يبذلونه علشان أتعلم، فكان كافي جدًا بل للآن أنا عاجزة عن شكر هذي الثلاث أشهر.

تعلمت بالمتابعة والتلقين المباشر من شخص أخبر مني زي ما يقولك Mentor

تعلمت أساسيات البرنامج من تايم لاين، وايفكتس ولايرات وحفظ ملفات ورندره و واجهة .. أخذ مني خمسة أيام

لكن اتقان المميزات وتجريب الخصائص المختلفة استهلك الثلاث أشهر … أما عن استكشاف جميع الخصائص فهي رحلة لاتنتهي.

مع التوجيه .. كنت أتابع شروح اليوتيوب، درس ورا درس .. ميزة اليوتيوب يعلمك أشياء صغيرة هنا وهناك تعطيك حصيلة لا بأس بها لكنها أحيانا تكون مضيعة وقت … برضو في البدايات تضييع الوقت هذا مقبول لأنك تحاول تستوعب البرنامج أكثر

بعدها صرت أتعلم بالممارسة .. كثرت ممارستي للبرنامج وصرت أسرع وصرت أكتشف أساليب جديدة

الشيء اللي اسويه في يوم، صار ممكن أسويه بساعات …. بعدها شعرت إني غير مكتفية، وأني يادوب قلت بسم الله.

اتقان الأدوات لايعني الحصول على نتائج مرضية. وبدأت أبحث! وين ألقى مختصين وناس ممكن أتعلم منهم!

بارك الرب في قوقل، وصلت لعدة مواقع أجنبية

متخصصة في الموشن، وبدأت أخيرًا أشتري كورسات بعد ماقدرت أجني المال من خبرتي البسيطة بالبداية

استثمرت في تعلمي مبالغ كبيرة. حاولت إني أدرس على أيدي الأسماء المعروفة بالمجال

واخترت إني أركز على الإلستريشن والآرت دايركشن بعد ما أخذت أفكار عامة عن نواحي المجال.

ووقتها كان وقع الدروس على ممتاز، لأني ماضيعت وقت في الأساسيات .. أخذت الكورسات وأنا مجربة لين قلت بس

فحسيت إنهم رتبوا أفكاري وساعدوني أرفع من جودة أساليبي

عرفت إن فيه أساسيات الكل يدور حولها .. إذا استوعبتها، عرفت تمسك خط في المجال

وإن الممارسة العملية لا يوازيها شيء .. بعد عدة محطات عمل عدة أقدر أقولك إني تعلمت من مدرّبي، ومن زملائي بالعمل، ومن اليوتيوب ومن الدروس المدفوعة، وحتى لما أصبحت مدير … تعلمت من الأشخاص اللي أديرهم. يوم ورا يوم

وأنا الآن فريلانسر … أتعلم من التجربة، من الصواب والخطأ، مما ينشر الناس في الإنترنت من تجارب ونصائح، ومما أواجه شخصيًا.

لذا لو بلخص إجابتي فبتكون كالآتي :

1/ خذ نظرة عامة من قوقل عن المجال (بحث حُر).

2/ استنفذ مقاطع اليوتيوب والكورسات المجانية.

3/ احصل على تدريب، فالتعلم من خلاله أسرع بكثير.

4/ استثمر مالا في كورسات متخصصة من محترفين.

5/ مارس قدّ ماتقدر.

6/ إن تعلمت … شارك المعرفة.

وأرجوك قبل لا تاخذ أي كورس .. ابحث عن أعمال مقدم الكورس، هل حاب تصير زي كذا يومًا ما؟ إذا ما أرضتك أعماله .. اترك الكورس.

الأمر بسيط ….. ابدا، وانوي … وفالك التوفيق

ملاحظة: الرسمة في مغلف التدوينة ليست من عملي وحقوقها تعود لمستشفى ابو الريش*

لمشاهدة كامل العمل، انقر هنا.

مع كل الحب- عايشة.