كيف أتعلم أدوبي فلاش؟

 

مرحباً بالجميع ،

صباح ثاني يوم من بداية الدوامات ، وبعد إجازة طويلة

يارب انكم ارتحتم بشكل كافي و( مستعدين للإنجاز ) طلاب أو موظفين .

طيّب ، ندخل في الموضوع

في عملية صناعة الأنميشن راح تمّر بمرحلة تحتاج تحدد فيها البرنامج اللي راح تستخدمه في التحريك

هل هو ثنائي ابعاد ؟ ثلاثي أبعاد ؟ احترافي ؟ للمبتدئين ؟

فحبيت إني أشير في هالتدوينه لأحد البرامج اللي قد يهمك الاطلاع عليه في مشوارك الفني 

وهو Adobe FLASH – البرنامج احد أبناء المجموعة الضخمة ADOBE وهذا بحد ذاته شيء يريحك لأنك تتعامل مع مجموعة احترافية ولها ستايل واحد في برامجها بمعنى إنك اذا كنت تستخدم الفوتوشوب ماراح تتعب في تعلم البرامج الثانية لأدوبي لأنها متشابهه في الادوات والقوائم .

“بالمناسبة إذا كنت طالب أو معلم ، شركة ادوبي تعطيك خصم ٦٠٪ على برامجها” .

 ماراح اتكلم عن ميزات وعيوب البرنامج، تقدرون تحصلونها في قوقل، لكني راح اطلعكم على أنميشن قصير صنع بواسطة الفلاش

 

https://www.youtube.com/watch?v=okmNndMz3Ls

 

نفترض بإن امكانيات البرنامج اعجبتك ، كيف تتعلم الفلاش !

ربما الجواب بديهي، لكنه قد يطرح مصادر غايبه عن بالك ، والحقيقة بإن هالتدوينة رد على استفسار الأخ جودالله العتيبي عن إذا كان فيه مصادر للتعلم غير اليوتيوب ! ، أكيد فيه ، وهذي المصادر عموماً :

• المعاهد التدريبية :

ابحث عن المعاهد التدريبية اللي تقيم دورات في الأدوبي فلاش وعلى حد علمي إنها قليلة

أحد أهم هالأماكن معهد الأمير أحمد في الرياض ، وهذا رابط موقعهم الرسمي  http://www.asami.com.sa/short_courses_ar.asp?id=6

يقيم الدورة لمدة ٢٠ ساعة خلال خمسة أيام بـ ٢٠٠٠ ريال . المعهد ممدوح وسمعته جيدة . إذا كنت بالرياض أو تعرف معهد مشابهه يقيم دورات ممتازة في الفلاش، خذ وحدة واحرص إنك تكون متحمس وقتها لا تدخلها خوفاً من انها تروح عليك لأنك إذا ماكنت مستعد وتتابع تدريبات في البيت وتجيهم وعندك استفسارات من بكرا معناته إنك م استفدت أكبر استفادة ممكنة .

 

• الدورات الجامعية :

ابحث عن الدورات اللي تقدمها جامعتك . أعرف إن دورات من هالنوع نادر تُقام ، ولا أعرف إذا فيه جامعات تقدمها لكني شخصيا أخذت دورة  في جامعة الملك سعود لمدة ٢٤ ساعة من مدربة محترفة + مجانية . يميز هالشيء وجود قائد يقود العملية التعليمية بدل مَ تتشتت وانت تبحث كل مرة عن شغلة جديدة وماتدري وش ناقصك ومن هالهرج . بالاضافه لإنك مو مجبر تحضر كل الساعات وأخيراً حتى لو ماكنت متحمس كثير مافي شيء تخسره ، تدخل تتعرف عالبرنامج اثناء بريكاتك ومتى ما فضيت تجلس عليه .

“ملاحظة: طالبات جامعة الملك سعود ، راجعوا نادي الاعلام إذا كنتم مهتمين بهالمجال لأنهم يطرحون دورات من فترة لفترة بهالخصوص“

 

• الكتب :

الكتب أجمل شيء في هالحياة ، خلاصة خبرة المحترفين ، شيء منظم ومفصل وفي نفس الوقت مبسط . الفهرس يساعدك تتجاوز الشغلات اللي تعرفها فاستخدام كتاب يحفظ وقتك بالإضافة لإنه كنز بيكون معك زي المرجع متى مَ احتجت ترجع له و سعره منخفض نسبياً . أحد الكتب اللي انصح فيها “تعلم بدون تعقيد FLASH CS6 ولغة اكشن سكريبت وتطبيقاتها العملية” للأستاذ احمد خميس، اخذته من معرض الكتاب الدولي بالرياض من المركز المصري لتبسيط العلوم . سعره مايتجاوز ال٦٠ ريال . وهذا موقعه للي حاب يطلع عليه | http://www.ahmedkhamiss.net

 

• المواقع عبر الانترنت :

الانترنت ، أنا اعتبره عدالة السماء ، لوول . يعني وش ماكانت ظروفك وامكانياتك تقريباً النت هو الشيء الوحيد اللي يخليك ماتعذر احد . مواقع الانترنت كثيرة وكل يوم يطلع موقع ثاني يشرح دروس فلاشية . وغالباً مايكون هالشيء من محترفين اعطوك وقتهم وخبرتهم بالمجان . عدم استغلالك لهالشيء مخجل بغض النظر عن تخصصك . بضغطة زر آلاف المعلومات بين يديك مجاناً وفي “أي وقت” و “أي مكان بالعالم” … يجي هنا عائق يتعذر فيه العرب وهو اللغة . بتقولي اغلب الشروح بالانجليزي !

منصة مهارة الحل الأمثل ، شروح مرتبة وبالعربي ، هذا رابطها https://www.maharah.net/courses/flashcs5

أتوقع بعد كذا مالك عذر 🙂

 

ومن هالمنطلق ندعوك تحط الانجليزيه في بالك لأن أغلب المعلومات تنزل بهاللغة .

• اليوتيوب :

غني عن التعريف . اليوتيوب شرح صوت و صوره لو ماتفهم اللغة تقدر تتابع الحركات وتوصل لنتايج حلوة

تقدر تعيده مليون مره لو مافهمت ، وبالأخير تقدر تسأل صاحب المقطع وتتواصل معه بشكل مباشر . اليوتيوب فيه كثير من الاساتذه , واحد من اللي احبهم JAZZA ، وهذا احد مقاطعه، ابحث في قناتهhttps://www.youtube.com/watch?v=krPSSgdRbA4

 

 

و اخيراً أتمنى انكم تكونون عرفتم وين تلقون المعلومة . لأن إذا عندك المعلومة تقدر تنطلق .